Հայաստանի դեսպանը մասնակցեց Diplomat Magazine-ի համատեղ առցանց մամուլի ասուլիսին

20 մայիսի, 2020

Ս․թ․ մայիսի 20-ին դեսպան Տիգրան Բալայանը մասնակցեց Diplomat Magazine պարբերականի կողմից կորոնավիրուսի և դրա հետևանքների վերացման դեմ միջազգային պայքարին նվիրված համատեղ առցանց մամուլի ասուլիսին, որի բանախոսներն էին Նիդերլանդներում Չինաստանի, Ամերիկայի Միացյալ նահանգների, Հայաստանի և Իտալիայի դեսպանները։

Իր ներածական խոսքում Տիգրան Բալայանը շնորհակալություն հայտնեց Diplomat Magazine-ի թիմին, որն այսպիսի յուրօրինակ հարթակի միջոցով համախմբել է դեսպաններին՝ կորոնավիրուսի համավարակի հետևանքով առաջացած աննախադեպ մարտահրավերների վերաբերյալ իրենց տեսակետներն ու փորձառությունը հանրությանը փոխանցելու համար։

Դեսպանը հանգամանալից անդրադարձ կատարեց համավարակով պայմանավորված Հայաստանում արտակարգ դրության հաստատման ռեժիմին, կորոնավիրուսի հետագա կանխարգելման ուղղությամբ կառավարության ընդունած ռազմավարությանը, իրականացվող սոցիալական ծրագրերին, արտերկրում գտնվող ՀՀ քաղաքացիների հայրենիք վերադարձի ուղղությամբ տարվող աշխատանքներին։ Դեսպանն առանձնահատուկ կարևորեց համավարակի ամբողջ ընթացքում միջազգային համագործակցության շնորհիվ գործընկեր երկրների կողմից Հայաստանին ցուցաբերվող շարունակական աջակցությունը։ Այս համատեքստում դեսպանը շնորհակալություն հայտնեց Չինաստանին և ԱՄՆ՝ համավարակի դեմ պայքարում Հայաստանին աջակցելու համար։

Կարևորելով միջազգային հանրության միասնականությունն ու համերաշխությունը COVID-19 համավարակի համաշխարհային մարտահրավերի դեմ պայքարում և այդ առումով պետությունների կողմից պատասխանատու վարքագծի դրսևորումը՝ դեսպան Բալայանը լրատվամիջոցների ուշադրությունը հրավիրեց Հայաստանի անմիջական հարևանությամբ՝ Ադրբեջանում, ընդդիմադիր ուժերի և լրատվամիջոցների ներկայացուցիչների նկատմամբ ահագնացող ճնշումներին, ինչպես նաև՝ ԼՂ շփման գծում և ՀՀ հետ սահմանին հրադադարի ռեժիմի պարբերական խախտման դեպքերին՝ հակառակ ՄԱԿ-ի ԳԽ և Հռոմի Պապի՝ համաշխարհային հրադադար հաստատելու կոչերին։ Ավելին, համաճարակի պայմաններում Ադրբեջանը՝ միջազգային պարտավորությունների կոպտագույն խախտմամբ, Արցախի հետ շփման գծի երկայնքով 10000 զինվորականների ներգրավմամբ զորավարժություններ է անցկացնում։

Դեսպանների առցանց ասուլիսը լուսաբանում էին նիդերլանդական, չինական, հայկական և ամերիկյան առաջատար լրատվամիջոցների ներկայացուցիչներ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր